يا بحر بسألك ليش أمواجك الليلة تعاني
أنت مثلي يا بحر حتى أنت فاقد لك حبيبه
أنت متضايق عشانك ولا متضايق عشاني
أبسألك بالله قلي يا بحر وشهي المصيبه ؟
ولا أقول : إسكت وأنا بحكي عن اللي لك خذاني
ببتدي معك الكلام وكل ما عندي بجيبه
تذكر اللي لا لفتني بشّر القلب المحاني
تذكر اللي كلها حب وغرام ونهر طيبه
تذكر اللي صوتها تشتاق له حتى المواني
كل ميناء يسأل الثاني إذا طول مغيبه
تذكر اللي في كفوفي تشعل الدنيا اماني
تذكر اللي نورها سود الليالي تقتدي به
تذكر اللي سلهمتها تقلب الساعة ثواني
تذكر اللي عطرها حتى طيورك تحتفي به
تذكر اللي علمتني كيف أروض هالمعاني
كل ما مرت علي رحت للشعر أنتخي به
تذكر اللي كل صبح تمرني بأحلى تهاني
صار كل العمر عيد وصارت أقرب من قريبه
قبل عامين تركتني ورحلت مع شخص ثاني
شخص ما كانت تحبه بس ما أدري وش تبي به
أدري إني من سببها كاسرٍ خاطر زماني
و أدري إني أول إنسان كسر خاطر نصيبه
وأدري إن الله خذى مني مثل ما هو عطاني
وأدري إن الغاليه راحت رضى ماهي غصيبه
بس أقول الله كريم وعمر كل الناس فاني
والمكان اللي خلا من زولها وش ينبغي به
مدخلك بالله قل لي..... حط نفسك في مكاني
وش تسوي يا بحر لا صارت فاقد لك حبيبه؟!!
~..منقـــول..~
الخميس نوفمبر 08, 2007 5:56 am
